អ៉ីតាលី៖ ប្រភពសារព័ត៌មានជាច្រើននៅប្រទេសអ៊ីតាលីបានចុះផ្សាយថា លោក Antonio គ្រោងនឹងចាកចេញពីក្លិបបាល់ទាត់អ៊ីតាលី Inter Milan ក្នុងរយៈពេលយ៉ាងយូរ ៤៨ម៉ោងទៀត បន្ទាប់ពីដឹកនាំក្លិបឈ្នះជើងឯក Serie A ក្តៅៗនៅក្នុងឆ្នាំ ២០២១ នេះ។

លោក Antonio Conte បានបង្ហាញសាច់ដុំរបស់លោក ក្នុងការដឹកនាំ Inter Milan ជោគជ័យខ្លាំងក្នុង ២រដូវកាលចុងក្រោយនេះ ជាពិសេសការបញ្ចប់ការឈ្នះពានលីគកំពូលអ៉ីតាលី ៩រដូវកាលរបសើ Juventus។ ប៉ុន្តែអ្វីដែលគេរាយការណ៍ថា ជាចំណុចតឹងសសៃ-ករវាងលោក​ Conte ជាមួយម្ចាស់ក្លិបជាសេដ្ឋីជនជាតិចិននោះ គឺការរឹតត្បិតកញ្ចប់លុយក្នុងការចាយចាយទិញកីឡាករថ្មី នាទីផ្សារដោះដូរកីឡាករនារដូវក្តៅនេះ។ 

បើតាមប្រភពពីសារព័ត៌មាន La Gazzetta dello Sport បានចុះផ្សាយថា ​ប្រធានក្លិបលោក Steven Zhang បានជូនដំណឹងថា ក្លិបត្រូវលក់នូវកីឡាករសំខាន់មួយចំនួនចេញយ៉ាងហោចណាស់ក្នុងទឹកប្រាក់សរុប ៨៦លានអឺរ៉ូ ខណៈដែលកីឡាករដែលនៅសេសសល់នឹងត្រូវកាត់ប្រាក់ខែប្រមាណ ២០%។ ក្រោយពីការរង្គោះរង្គើទំនាក់ទំនងរវាងភាគីប្រធានក្លិបលោក Steven Zhang និងលោក Antonio Conte ក្លិបបាល់ទាត់ Tottenham Hotspurs ត្រូវបានគេរាយការណ៍ថា បានដាក់សំណើចង់បានគ្រូបង្វឹកវ័យ ៥១ ឆ្នាំនេះទៅដឹកនាំនៅទឹកដីអង់គ្លេសវិញ ខណៈដែលបច្ចុប្បន្ននេះ កុងត្រារបស់អតីតគ្រូបង្វឹកតោខៀវ Chelsea រូបនេះកំពុងចរចាជាមួយ Inter មានថ្លៃនឿយហត់ប្រមាណជា ៥,២លានអឺរ៉ូក្នុងមួយរដូវកាល៕